ഒന്നാം ക്ലാസ് ഓർമ്മകൾ..

പഴയ ഡയറിയിൽ നിന്ന് കിട്ടിയത്

അന്നാദ്യമായറിവിൻ തീരത്തേ-

ക്കാർത്തുല്ലസിച്ചെത്തുമ്പോഴേക്കും

പുറത്ത് പൂമഴ പെയ്തിരുന്നു...

പുത്തൻ പുള്ളിക്കുടയെ പുളകമണിയിച്ച

മഴയെ മനമേറെ മാനംനോക്കി

സ്തുതിച്ചിരുന്നു...

ഓവിൻചാലിലൂടെയൊഴുകി-

യെത്തുന്ന മഴവെള്ളം നോക്കിയേറെ

കിന്നാരം പറഞ്ഞിരുന്നു...

ഓടിൻ മുകളിലൂടെയൂറിവരുന്നോ-

ളങ്ങളോരോന്നും, വരാന്തയിൽ

മിഴിച്ചിരുന്നെന്നെ നനച്ചിരുന്നു...

സ്കൂളിനോരത്തുള്ളംഗൻവാടിയിൽനിന്ന്,

കിനാകണ്ടിരുന്ന സാമ്രാജ്യമന്നെൻ

കൊച്ചുകൈകുമ്പിളിലായിരുന്നു...

ഓർമ്മകളോളങ്ങളായുർന്നപ്പോളാ

ഗാന്ധിയൻ ഹെഡ്മാഷ്-പാദരക്ഷ

ധരിക്കാത്ത 'മീശ' മുന്നിലെത്തിയിരുന്നു...

കൂടെയാർത്തു വിളിച്ചിരുന്ന 

കൂട്ടരെ നോക്കി പാവമാം

ഞാനന്ന്, തരിച്ചിരുന്നു...

പോയിടുന്നതെൻവാപ്പ

യാത്രചോദിച്ചപ്പോളറിയാതെ

മിഴി നിറഞ്ഞിരുന്നു...

അന്നുച്ചയ്ക്ക് വിട്ട സ്കൂളിൽ

നിന്ന് വന്നയുടനെ വീട്ടിലുമ്മയെ

കെട്ടിപ്പിടിച്ചു കരഞ്ഞിരുന്നു...

ഒടുവിലോർത്തത് സമർത്ഥ-

നല്ലെങ്കിലും മിടുക്കന്റെ മുന്നിൽ

ജയിച്ചയക്ഷരം 'ഋ'

തോടിന്നരികിൽ കണ്ടുഭയന്ന

ഞണ്ടിനെപ്പോലെ

ഭീതി സൃഷ്ടിച്ചിരുന്നു...

ശഫീഖ് മുഴക്കുന്ന്