എന്റെ നബി

പാവങ്ങൾ ഞങ്ങൾ 

ഞങ്ങളുടെ നേതാവിനെ 

ഓർത്തു ഒന്ന് കരഞ്ഞോട്ടെ...

ദയവ് ചെയ്തു കരയാൻ പ്രമാണം വേണമെന്ന് ശഠിക്കരുത്...

ഞങ്ങളുടെ അനുഗ്രഹത്തിൽ 

സന്തോഷിച്ചോട്ടെ..

അപശബ്ദങ്ങൾ കൊണ്ട് 

അസ്വാരസ്യമുണ്ടാക്കരുത്...

ഞങ്ങളുടെ നായകനെ 

കിനാവ് കണ്ട് 

ഞങ്ങളൊന്ന് പാടിക്കോട്ടെ 

സ്വരപ്രശ്നം പറഞ്ഞു

ശല്യം ചെയ്യരുത്..

ഞങ്ങളുടെ പ്രണയത്തെക്കുറിച്ച് 

അല്പം കഥ പറഞ്ഞോട്ടെ

വ്യാകരണപ്രശ്നം പറഞ്ഞു 

ബഹളം വെക്കരുത്..

സ്നേഹമാണ് എന്റെ നബി (സ്വ)

*ഏവർക്കും നബിദിന ആശംസകൾ*

കാത്തിരിപ്പ്

ഇന്നും ഏറെ വിഷാദത്തോടെയാണ് വിരിപ്പിൽ നിന്ന് എഴുന്നേറ്റത്...

ഇന്നലെയും കിനാവിൽ വന്നില്ലല്ലോ...

ഒരു തവണയെങ്കിലും സ്വപ്നത്തിലെങ്കിലും കാണാൻ കഴിയുമെന്ന പ്രതീക്ഷയിലാണ് ഓരോ ദിവസവും തള്ളി നീക്കുന്നത്...

എന്നാണെന്റെ ഈ അനന്തപ്രണയം ആരംഭിച്ചത്...

ഷെക്സ്പിയർ പറഞ്ഞത് നയനങ്ങളിൽ നിന്നാണ് പ്രണയമാരംഭിക്കുന്നത് എന്നാണ്.

അതിന് ഞാനിത് വരെ നിന്റെ കണ്ണുകൾ കണ്ടിട്ടില്ലല്ലോ...

"മാംസനിബിദ്ധമാണ് രാഗം" എന്നാണ് എന്റെ കൂട്ടുകാരൻ പ്രണയത്തെക്കുറിച്ച് പറയാറുള്ളത്.

അതിന് നിന്റെ ആകാരസൗന്ദര്യവും ഞാനിത് വരെ കണ്ടിട്ടില്ലല്ലോ..

എന്റെ ഭാവനയിൽ വരച്ചു വെച്ച ചിത്രം അപൂർണമാവും തീർച്ച.

ഇനിയിപ്പോ പകൽക്കിനാവിലഭയം തേടാനുള്ള ശ്രമത്തിലാണ്.

ഒടുവിൽ ഒരിക്കലെങ്കിലും കനവിലെങ്കിലും വരുമെന്ന പ്രതീക്ഷയിൽ.....

പ്രിയൻ

എന്റെ നാട്

ഓ ... ജന്മഭൂമി

ചിറകറ്റ നിന്റെ കിനാവുകൾക്ക്

വെയിലത്ത് കുടചൂടുന്നതാരാണ്?

ആത്മാവ് തേടുന്ന

നഷ്ടസ്വപ്നങ്ങൾക്ക് 

അമൃത് കനിയുവാൻ

പാലാഴി കടയുന്നവനാരാണ്?

സ്വപ്നരാജ്യം തീർക്കുവാൻ

മൗനത്തിന്റെ നിലവിളി

ആഘോഷിക്കാൻ

വാക്കുകൾ

പ്രകമ്പനം തീർക്കണം

ആയിരം ആയുസ്സോടെ 

'അഗ്നിച്ചിറകുകൾ'

മഴവിൽ തീർക്കണം

വിവേകാനന്ദന്റെ

'മാൻ ബിൽഡിംഗ്' വിജ്ഞാനം

കറതീർക്കണം

ഓർമ്മകൾക്ക്

ചിതയൊരുക്കുന്നവരോട്

കലഹം കൂട്ടണം

ഓർക്കാൻ മറന്നിട്ട

ഇന്നലെകൾ ഉറക്കെ വായിക്കണം

തമസ്സിന് ചൂട്ടുകെട്ടാൻ

മതിലുകൾ ഭേദിക്കണം

ഇന്ത്യ ജ്വലിക്കുവാൻ

വിയർപ്പുകൾ നിലാവ് പരത്തണം

മണ്ണിൻ മണം

ഉയിർപ്പിൻ സൗഗന്ധിയാകണം

മരണവീട്ടിലെ 'ആൺ'

അന്ന് വരെ

മരണവീട്ടിലെ ആണുങ്ങളെന്നും

ചോദ്യചിഹ്നമായിരുന്നു.

നിർന്നിമേഷരായി കർമങ്ങൾക്ക്

നേതൃത്വം കൊടുക്കുന്നവർ

അത്ഭുതമായിരുന്നു.

അന്നൊരു അർധരാത്രി

ആശുപത്രി വരാന്തയിൽ

കണ്ണുനീരിനെ കെട്ടിനിർത്തുന്നത് വരെ

പൊരക്കെത്തുമ്പോഴേക്കും

ആണായ ഞാൻ കരഞ്ഞു തീർക്കണമെന്ന് തീരുമാനിക്കുന്നത് വരെ

മൗനനിലവിളിയുടെ ഒച്ചയിൽ

ഒന്നും കേൾക്കാതാവുന്നത് വരെയും

എത്ര വലിയ വേദനയും കടിച്ചിറക്കാമെന്ന് അന്നാണനുഭവിച്ചത്.

സങ്കടവും വിരഹവുമെല്ലാം ചേർന്ന് പുതിയൊരു  വികാരമുണ്ടെന്നറിഞ്ഞതന്നാണ്.

ഉപ്പയെ ഖബറടക്കിയതിന് ശേഷം

മണിക്കൂറുകൾ കഴിഞ്ഞാണ്

'ഞാനാണ്' മയ്യിത്ത് കുളിപ്പിച്ചതെന്ന് ഞാനറിയുന്നത്

ആണുങ്ങൾ 'വികാരരഹിതരാവുന്നത് '

അനുഭവിച്ചറിഞ്ഞതന്നാണ്

6/05/22

ശഫീഖ് മുഴക്കുന്ന്

നല്ല പൗരൻ

എബ്രഹാം ലിങ്കന്റെ A NICE CITIZEN

 എന്ന കവിതയുടെ വിവര്‍ത്തനമാണിത്. ലിങ്കന്‍ തന്റെ മകന്റെ അധ്യാപകന് എഴുതു ഒരു കത്ത് രൂപത്തിലുള്ള കവിത

 

നല്ല പൗരൻ

വിവ: *ശഫീഖ് സിദ്ദീഖി മുഴക്കുന്ന്*

എനിക്കറിയാം,

എല്ലാവരും നന്മയല്ലെന്ന് അവന്‍ പഠിക്കേണ്ടതുണ്ട്

എല്ലാ മനുഷ്യരും സത്യമല്ലെന്നും

എങ്കിലും അവനെ പഠിപ്പിക്കണം

എല്ലാ തെമ്മാടിയിലും ഒരു ഹീറോയുണ്ട്

എല്ലാ സ്വാര്‍ത്ഥരാഷ്ട്രീയക്കാരിലും

ഒരു സമര്‍പ്പിതനായകനുണ്ട്

എല്ലാ ശത്രുവിലും വെറുപ്പിനെ അകറ്റുന്ന മിത്രമുണ്ടെന്ന് അവനറിയണം.

കഴിയുമെങ്കിൽ

ചിരിയുടെ രഹസ്യവും

അധികാരം കൊണ്ട് ഭീതി തീര്‍ക്കുന്നവര്‍

പരാജയത്തിലേക്ക് ഏറ്റവും അടുത്തവരാണെും

അവന്‍ അറിയാന്‍ അനുവദിക്കുക.

പുസ്തകങ്ങളുടെ അത്ഭുതത്തെക്കുറിച്ച്

പഠിപ്പിക്കുക.

എങ്കിലും ആകാശത്തിലെ പറവകളുടെയും,തേനീച്ചകളുടെയും,

പച്ചക്കുന്നിന്‍ചെരുവിലെ പൂക്കളുടെയും

അനശ്വര നിഗൂഢതകളെക്കുറിച്ച്

ചിന്തിക്കാന്‍ സമയം നൽകണം.

സ്‌കൂളിൽ വഞ്ചനയേക്കാള്‍

മാന്യതയേറിയത് തോൽവിയാണ്.

എല്ലാവരും തെറ്റാണെന്ന് പറഞ്ഞാലും

ആദര്‍ശങ്ങളിൽ അടിയുറച്ച് നിൽക്കാന്‍ പക്വമാക്കണം.

മാന്യരോട് മാന്യനാവാനും

അഹങ്കാരികളോട് അഹന്തയിലാവാനും.

ആള്‍ക്കൂട്ടം ആഘോഷങ്ങളിൽ അലിയുമ്പോള്‍

അനുഗമിക്കലല്ല ശക്തിയെന്ന വിവേകം

മകന് നൽകാന്‍ ശ്രമിക്കൂ.

എല്ലാവരെയും കേള്‍ക്കാനും സത്യത്തിന്റെ

സ്‌ക്രീനിലൂടെ അരിച്ചെടുക്കാനും

നല്ലത് മാത്രം സ്വീകരിക്കാനും ശീലിപ്പിക്കുക.

വ്യസനത്തിൽ ചിരിക്കാനും

കണ്ണുനീരിൽ നാണിക്കാതിരിക്കാനും

ദോഷദര്‍ശികളെ നോക്കി ചിരിക്കാനും

അമിതസന്തോഷത്തെ സൂക്ഷിക്കാനും പഠിപ്പിക്കുക.

ആരോഗ്യം വിൽക്കാനും

ബുദ്ധിയാണ് അമൂല്യമെുന്നും

ആത്മാവിനും ഹൃദയത്തിനും

വിലയിടരുതെുന്നും പഠിപ്പിക്കുക.

ആള്‍ക്കൂട്ടത്തിന്റെ ഓരിയിടലുകള്‍ക്ക് നേരെ

ചെവിയടക്കാനും

ശരിയെന്ന് നിനക്കുന്നതിനുവേണ്ടി

നിൽക്കാനും പോരാടാനും പഠിപ്പിക്കുക..

അവനോട് മാന്യതയിൽ ഇടപെടുക.

ലാളനയരുത്,കാരണം

തീയിൽ ഉരുക്കിയാലേ കാരിരുമ്പ് ലഭിക്കൂ.

ധൈര്യശാലിയാവാനുള്ള ക്ഷമകാണിക്കാനും

അക്ഷമനാവാനുള്ള ധീരതയും നൽകുക.

എപ്പോഴും സ്വയം വിശ്വസിക്കാന്‍ പഠിപ്പിക്കുക.

എന്നാൽ മാനവികതയിൽ അവന്‍ വിശ്വസിക്കും.

ഇത് വലിയ ഒരു ഓര്‍ഡറാണ്.

എങ്കിലും നിങ്ങള്‍ക്ക് കഴിയും.

എന്റെ മകന്‍ നല്ലവനാണ്.

ഉള്ളിന്റെ ഉള്ള്

ഉള്ളിന്റെ ഉള്ളിൽ 

ഇത്തിരി സ്നേഹം 

നിറച്ചു വെക്കൂ

പുറംമോടികൾ മാഞ്ഞുപോവുമ്പോൾ

ജീവന്റെ ശ്വാസമാകും.

രുചിഭേദങ്ങൾ

അബോധ മനസ്സിൽ

സേവ് ചെയ്യൂ

പോസിറ്റീവ്* കാലത്ത്

ഓർത്തോർത്ത് രുചിക്കാം.

വായനയെ ആസ്വദിക്കൂ

ഏത് തടവറയും

സ്വാതന്ത്ര്യത്തിന്റെ 

ആരവം തീർക്കും.

*കോവിഡ്

BEAUTY OF PAIN

  BEAUTY OF PAIN

 

Those moments are colours

Those hours are flowers

Those days are ornaments

Those years are dreams

 

These sweets are pain

Drink the beauty of pain to the least

These diversities is unity

Celebrate the glory of unity

These forgettings are dreadful

Save the humanity from the grave

Of amnesia.

                         Shafeek Muzhakkunnu (2010)

യാത്ര

അകം പൊരുൾ തേടി

അവർ യാത്രയായി..

കാടും മലകളും താണ്ടി

കാറ്റും മഴയും നനഞ്ഞു

വെയിലും തണുപ്പും ആസ്വദിച്ചു.

സംവാദങ്ങളുടെ തീക്ഷ്ണതയറിഞ്ഞു.

അറിവിന്റെ പലവഴിയിലൂടെ 

ഒടുവിൽ തിരികെയെത്തി.

ഒന്നാമൻ

അസംബന്ധമാണ് അർത്ഥം

നിഷേധം കൊണ്ട് നിർവചിച്ചു.

രണ്ടാമൻ

അഞ്ജതയാണ് അർത്ഥം

വിനയത്താൽ തലകുനിച്ചു

മൂന്നാമൻ

പൊരുളിന്റെ പൊരുൾ തൊട്ടു

മുഖം മണ്ണിലാഴ്ത്തി

ശഫീഖ് മുഴക്കുന്ന്

18/7/21

ഒരു വാക്ക്

ഒരു വാക്ക് മതി

അനീതിയുടെ

ആക്രോശങ്ങൾ

നിലക്കാൻ

ഒരു വാക്ക് മതി

നന്മയുടെ മഹാസമുദ്രം 

കവിഞ്ഞൊഴുകാൻ

ഒരു വാക്ക് മതി

ഹൃത്തിലാഞ്ഞുതറക്കുന്ന

അനേകമസ്ത്രങ്ങളേക്കാൾ

നീറ്റലാകാൻ..

ഒരു വാക്ക് മതി

മൗനത്തിന്റെ സംഹാരത്തെ

തോൽപ്പിക്കാൻ

ഒരു വാക്ക് മതി

അശാന്തിയുടെ

കരിമേഘങ്ങൾ നെയ്യാൻ

ഒരു വാക്ക് മതി

ഒരായിരം ആശ്വാസമാകാൻ

സ്നേഹമൊഴികളിൽ

പെയ്തൊഴിയാത്ത

വേദനക്കടലില്ല.

ചിലപ്പോഴൊക്കെ

നിഷ്കളങ്ക വാക്കുകളും

ക്രൂരമൊഴികളേക്കാൾ ഭീകരത സൃഷ്ടിക്കാറുണ്ട്

സ്ഥാനം തെറ്റാത്ത

വാക്കിന്റെ തേൻമഴ തോരാതിരിക്കട്ടെ.

*ശഫീഖ് മുഴക്കുന്ന്*

22/11/20

തിരിച്ചറിവ്

ആസ്വാദനം കയ്പേറുന്നത്

തമാശയുടെ അതിരറിയാതാകുമ്പോഴാണ്...

നിസ്വാർത്ഥതയെ ഉപദേശിക്കൽ

തന്നെ സ്വാർത്ഥയാണെന്ന് എന്നാണ് തിരിച്ചറിയുക?..

തമാശ കാര്യവും

സന്തോഷം തേങ്ങലുമാവാൻ

എത്ര നിമിഷം വേണം?

ഞാനൊരു തെറ്റും

അവൻ/അവൾ ഒരു ശരിയുമെന്ന

വിനയം മതി

വിശ്വം പ്രകാശിക്കാൻ..

തോൽവിയുടെ മധുരം

സാധ്യമാവുമ്പോഴാണത്രെ

ജീവിതം ധന്യമാവുക.

15/06/2020

ശഫീഖ് മുഴക്കുന്ന്

അതിജീവനം

സ്റ്റാറ്റസ് വെക്കാൻ

താല്പര്യമില്ലാത്ത

ഞാനീകാലത്തിന് ചേർന്നവനല്ലത്രെ...

മനസ്സുകൊണ്ട് മാത്രം

സ്നേഹിക്കാനറിയുന്നതാണെന്റെ പരാജയം.

സ്മൈലി സെൻസില്ലാതെന്നോട്

ഈ ജനറേഷന് പുച്ഛമാണത്രെ...

ഹൃദയം കൊണ്ട് ചിരിക്കാനേ

എനിക്കറിയൂ.

ഇൻസ്റ്റയിൽ ഇടമില്ലാത്ത

ഞാൻ ജീവിക്കാൻ പോലും യോഗ്യനല്ലത്രെ...

ഡാർവിന്റെ അതിജീവനസിദ്ധാന്തം

എന്റെ ദൈന്യതയിലേക്ക് നോക്കി

ക്രൂരമായി ചിരിക്കുന്നുണ്ട്.

പ്രിയപ്പെട്ടവരെ കുറിച്ചുള്ള

ആലോചനകൾക്കിടയിൽ

പോസ്റ്റുകൾക്ക് ലൈക്കിടാൻ മറന്ന എന്നെയവർ എന്നന്നേക്കുമായി

അൺഫ്രണ്ട് ചെയ്തു.

 ശഫീഖ് മുഴക്കുന്ന്*

18/09/2020

വായനയോർമ

വായനദിനവും പി.എം മാഷും...

ആദ്യമായി വായനശാലയിൽ അംഗത്വം

എടുക്കാൻ പോയത് രസകരമായ സംഭവമായിരുന്നു. എൽ പി സ്കൂളിൽ പഠിക്കുന്ന കാലം...മുനീർക്കയുടെ കൈയും പിടിച്ചു മുഴക്കുന്ന് വായനശാലയിലേക്ക് ചെന്നു. കുട്ടികൾക്കുള്ള പുസ്തകങ്ങളിൽ നിന്ന് ഒന്നെടുത്ത് ആർത്തിയോടെ അതിലേറെ അഹങ്കാരത്തോടെ ലൈബ്രറേറിയന്റെ അടുത്തേക്ക് ചെന്നു. ഗിരീഷേട്ടനാണെന്നു തോന്നുന്നു ലൈബ്രറേറിയൻ.

പെട്ടെന്നാണ് അത് സംഭവിച്ചത്. 

അംഗനവാടി കാലം മുതലേയുള്ള പേടിസ്വപ്നം...

പി. എം മാഷ് എവിടെ നിന്നോ കയറി വന്നു.  ഇടയ്ക്ക് വിരുന്നെത്തുന്ന ആ കണ്ണടക്കിടയിലൂടെയുള്ള നോട്ടം അന്നത്തെ അംഗനവാടി ഗ്യാങ്ങിന്റെ പേടിയായിരുന്നു...

വായനശാലയിൽ എത്തിയ ഉടനെ പുസ്തകവുമായി നിൽക്കുന്ന എന്നെയൊന്ന് അടിമുടി നോക്കി...

ആ നോട്ടത്തിൽ തന്നെ പകുതി ജീവൻ പോയിരുന്നു..

പ്രായത്തേക്കാൾ കുറിയവനെ കണ്ടു തെറ്റുധരിച്ച മാഷ്  പറഞ്ഞു.

 "ആ പുസ്തകം ഉറക്കെ വായിക്കൂ.."

എല്ലാ ആത്മവിശ്വാസവും ചോർന്ന് തപ്പിതടഞ്ഞു...

റിസൽട്ട് അപ്പോൾ തന്നെ വന്നു.

അംഗത്വം എടുക്കാൻ ആയിട്ടില്ല.

അടുത്ത ആഴ്ച തന്നെ അംഗത്വം എടുത്തത് മറ്റൊരു കഥ.

പിന്നീട് വർഷങ്ങൾക്ക്ശേഷം ഒമ്പതാം ക്ലാസിൽ പഠിക്കുന്ന സമയം. 

ലൈബ്രററി കൗൺസിലിന്റെ വായനാദിനവുമായി ബന്ധപ്പെട്ട വായനമത്സരത്തിൽ സ്കൂൾതല വിജയി ആയപ്പോൾ വായനശാലയിലെ അനുമോദനാനന്തരം പി.എം മാഷ് അടുത്തേക്ക് വിളിച്ചു. 

കുറച്ചു പുതിയ പുസ്തകങ്ങൾ കൈയിൽ തന്നിട്ട് പറഞ്ഞു. 

"കുട്ടി..താലൂക്ക് മത്സരത്തിലേക്ക് പോകും മുന്‍പ് ഈ പുസ്തകങ്ങൾ വായിക്കണം".

പുതിയ ഒരനുഭൂതിയോടെ ആ കണ്ണടകൾക്കിടയിലേക്ക് സൂക്ഷിച്ചു നോക്കി. അവിടെ നിറഞ്ഞു നിൽക്കുന്ന സ്നേഹവും കരുതലും ആവോളം ആസ്വദിച്ചു. 

ഇന്നിപ്പോൾ ഒരു വായനദിനം കൂടി വിരുന്നെത്തിയിരിക്കുന്നു...

വായന അനുഭവങ്ങളും പ്രോത്സാഹനങ്ങളും ഏറെയുണ്ട്...

അഹ്സനി ഉസ്താദ്,

ജനീഷേട്ടൻ, 

അരീക്കോട് മജ്മഅ,

രിസാല വാരിക... അങ്ങനെയങ്ങനെയങ്ങനെ.......

ഒന്നാം ക്ലാസ് ഓർമ്മകൾ..

പഴയ ഡയറിയിൽ നിന്ന് കിട്ടിയത്

അന്നാദ്യമായറിവിൻ തീരത്തേ-

ക്കാർത്തുല്ലസിച്ചെത്തുമ്പോഴേക്കും

പുറത്ത് പൂമഴ പെയ്തിരുന്നു...

പുത്തൻ പുള്ളിക്കുടയെ പുളകമണിയിച്ച

മഴയെ മനമേറെ മാനംനോക്കി

സ്തുതിച്ചിരുന്നു...

ഓവിൻചാലിലൂടെയൊഴുകി-

യെത്തുന്ന മഴവെള്ളം നോക്കിയേറെ

കിന്നാരം പറഞ്ഞിരുന്നു...

ഓടിൻ മുകളിലൂടെയൂറിവരുന്നോ-

ളങ്ങളോരോന്നും, വരാന്തയിൽ

മിഴിച്ചിരുന്നെന്നെ നനച്ചിരുന്നു...

സ്കൂളിനോരത്തുള്ളംഗൻവാടിയിൽനിന്ന്,

കിനാകണ്ടിരുന്ന സാമ്രാജ്യമന്നെൻ

കൊച്ചുകൈകുമ്പിളിലായിരുന്നു...

ഓർമ്മകളോളങ്ങളായുർന്നപ്പോളാ

ഗാന്ധിയൻ ഹെഡ്മാഷ്-പാദരക്ഷ

ധരിക്കാത്ത 'മീശ' മുന്നിലെത്തിയിരുന്നു...

കൂടെയാർത്തു വിളിച്ചിരുന്ന 

കൂട്ടരെ നോക്കി പാവമാം

ഞാനന്ന്, തരിച്ചിരുന്നു...

പോയിടുന്നതെൻവാപ്പ

യാത്രചോദിച്ചപ്പോളറിയാതെ

മിഴി നിറഞ്ഞിരുന്നു...

അന്നുച്ചയ്ക്ക് വിട്ട സ്കൂളിൽ

നിന്ന് വന്നയുടനെ വീട്ടിലുമ്മയെ

കെട്ടിപ്പിടിച്ചു കരഞ്ഞിരുന്നു...

ഒടുവിലോർത്തത് സമർത്ഥ-

നല്ലെങ്കിലും മിടുക്കന്റെ മുന്നിൽ

ജയിച്ചയക്ഷരം 'ഋ'

തോടിന്നരികിൽ കണ്ടുഭയന്ന

ഞണ്ടിനെപ്പോലെ

ഭീതി സൃഷ്ടിച്ചിരുന്നു...

ശഫീഖ് മുഴക്കുന്ന്

HORROR OF SILENCE

HORROR OF SILENCE

Shafeek P,

Junior Research Fellow

Did you sense the loveliness of silence?

Did you taste the sullenness of silence?

Did you adore the music of silence?

Did you disgust the crybluemurder of silence?

From this comes the grandeur of invention

And it wrote the golden folios of antiquity

From this descends the dimness of elitism

And it makes the fright of boneyard

Sometimes it gives the calm and cool

But sometimes it makes distressing clamor.

It sanitizes the fleck of mind.

And it gives the harmony of meditation.